Willi Tobler

100 De(sin)formationen auf Zeit(ungspapier) Der Thurgauer Künstler Willi Tobler stellt seine Künstlerische Auseinanderset-zung mit der Zeitung im November in der Baliere aus. Mit de Zytig goht d`Zyt im Hui Es hät gfiserlet. Fiini Flöckli sind vom Himmel abe gfalle. Vo Lampedusa bis Reykijavik vo Bukarest bis Santiago de Compostela sind ali Dörfer und Städt ali Wise und Bärg mit eme huuchzarte -me häts chuum gseh - roserote Zuckerguss überzoge gsii. De Wind hät Johrmärtmusig dur d`Gasse bbloset. D`Chind sind uf de RiPschuel zringelum gfahre und händ rägebogefarbigi Fähnli useghebet. D`Grosmüetere sind vo de Fridhöf zruggchoo und händ de-n-Enkel gsait me gwöhn sich an ales. Us de Chehrichtverbrennigsaalage sind Zuckerwatteräuchli in Himmel ue gschtige und bbrötlete Fridestube sind de Lüüt Sunntig und Werchtig uf em Täller glandet. Mane und Fraue di Pensionierte und ali andere händ Teilzyt-Ferie gnoh und sind mit zuckerwassertribne Düsejets über d`Spitzberg uf d`Oschterinsle gfloge. Di Junge händ Interrail-Tickets glöst zum halbe Priis. D`Soldate händ Militärguezli verteilt für en Chalte Hund und es isch fridlich gsii und still das me d` Fiserflöckli ghört hät uf d`Bluemewise abeschneiele … … so hät`s mer träumt. Und genau am füüf vor sechsi hät de Briefchaschteteckel gchlapperet. Und i bi mit allne Nochbere ufgschosse us em Tüüfschlof und us allne Wolke ghait. Und hunderti vo Bilder und tuusigi vo Wörter und abertuusigi vo Buechschtabe sind uf tünnem Zytigspapier zum Briefchaschte us gchroche. E ganzi Armee vo schwarze Zeiche isch iimarschiert i mis Hirni. Hüt und morn und übermorn und überübermorn und immer wider hät mi frischi Druckerschwärzi überfluetet und di schwarze Soldate händ mini Hirnregione bsetzt und i ha nüme gwüsst wo une und obe wo hine und vorne wa ggloge und wa d`Wohret isch und i ha mi müese wehre mit mini altersschwache Waffe. Mit Pinsel, Stift und Chriide mit Farb und Fantasii han i s`Misox und s`Maggiatal ali Wassermasse und Wahlkämpfer Bergschtürz und Bischöff und Bundesröt und di bleiwüeschte Schlachfelder übermolet. Und vo wiit hinefüre händ mi di alte Meischter underschtützt: De Anker und de Arcimboldo de Dürer und de Chaschper Wolf händ mi gschützt mit irne Bilder wo d`Zyt überduuret und bliibed. Und under mim Fenschter chlapperet de Briefchaschteteckel wiiter. Gescht und hüt und morn und übermorn und überübermorn. S`goht Schlegel a Wegge. Me hät kei Zyt meh zum langi Zyt z`haa … gescht isch hüt hüt isch morn morn isch übermorn … … scho verbii … Im Hui goht mit de Zytig d`Zyt

 

Vernissage:

08.11.2024, 19:00 Uhr
Einführung von Carole Breitenmoser & Anna Villiger, Kuratorinnen Finissage: So, 24. November 2024, 11 Uhr

 

Ausstellung:

Dauer: 08.11.2024 - 24.11.2024

 

Öffnungszeiten:

Fr 14 – 17 Uhr Sa 11 – 15 Uhr So 17 – 20 Uh

 

Kontakt:

willi.tobler@bluewin.ch

 

Download:
Einladungskarte_WilliTobler.pdf